【品牌故事】     Text /Mark      Photo / Mark + 受訪者

今屆的Lab Fellow由2022年7月進駐Trial and Error Lab至今已有9個月，喺相處嘅時間當中，都聽到好多Trial and Error 嘅故事，接住落嚟都會持續同大家分享一下佢哋嘅故事，今日就同大家講下插畫師 Daniel點樣喺創作嘅路上點樣「唔試唔知做得到……」。

初心

現代社會急速嘅生活下，有人仍然堅持用自己嘅創意/ 手藝，作為「搵食架罉」，係好難得嘅事。但點樣可以喺五花八門嘅插畫品牌下脫穎而出？就係嘗試將創作同我哋日常生活拉上關係。

成立品牌Daniel.c_art嘅過去3年間，Daniel以「水」為品牌創作嘅主軸，除咗因為生活上經常接觸到之外，更係利用水「多變」嘅特性，應用喺唔同嘅題材上面，例如：人與人之間的關係，令到作品更加豐富，更容易可以引起客人嘅共鳴。

嘗試

當時Daniel嘅作品主要喺網上發佈．直至Daniel要第一次擺市集嘅時候，他先至打算將作品由線上帶落線下，但係第一次嘗試嘅過程並唔順利。

印刷對於當時嘅佢，係一個全新嘅嘗試，因為唔熟悉印刷所需要嘅稿件格式同尺寸比例，令成品印出嚟冇預期嘅效果，圖案線條唔夠清晰，所以最後嗰批產品無賣到，不但無收入仲蝕咗成本（好傷心）。但佢無放棄到，之後佢向唔同嘅人求問或上網搵資料，慢慢學識印刷嘅知識。佢仍然堅持用實體印刷嘅原因，係因為佢好想展現出作品嘅質感。

堅持

Daniel會用唔同印刷方法製作產品，3年之間累積出品超過30款產品，當中唔單單有紙品，更加有布袋、帽甚至鎖匙扣。

被問到點解仍會堅持會用印刷自己作品，因為佢希望紙張成為佢插畫嘅載體，將自己嘅想法同說話，透過實體同客人有一個有溫度嘅交流。

嘗試嘅過程少不免會撞板，但唔試過唔錯過，又點會知自己做唔做到，所以即管放膽去試啦！