【品牌故事】     Text /Mark      Photo / Mark + 受訪者

「用作品說話」正正形容每一位經營緊自家品牌嘅手作工藝師。今次我哋訪問咗兩位實驗室伙伴，佢哋會講下各自經營手作品牌嘅苦與樂，同埋分享喺經營品牌嘅路上，點用作品對顧客說話。

初心——不做主流眼中的「我」

講到用作品說話，就要分享兩位實驗室伙伴嘅手作品牌，Patterntone同da HERS。

Patterntone可以解做圖案，亦可以解作模式，創辦人Wing希望可以用圖案陪伴大家，搵到喜歡嘅模式。Patterntone由2018年開始營運，用唔同種類嘅Pattern推出咗手縫筆記簿、貼紙同紙膠帶等嘅產品。

一開始Wing以兼職形式經營，但佢發現要同時要工作同經營品牌，實在好難兩方面都兼顧到。所以兩年前，佢決定放低工作，用以前嘅積蓄全心投入經營手作品牌，並將經營模式由網上轉到實體市集。

da HERS喺2022年中成立，至今已開辦10個月。啱啱畢業嘅Amanda無選擇一份主流社會眼中嘅「好」工，反而決定成為別人眼中「冇前途/ 搵唔到食」嘅手作工藝師。

佢認為，以前冇真正跟從自己意思去揀科，所以決定喺大學畢業後「試下突破呢個社會嘅想法，去做別人眼中睇落好似冇前途/搵唔到食咩嘅工作」，參加咗Trial and Error Lab實驗室伙伴計劃，成為Fellow，展開Slasher之旅。

而二人為咗分享建立品牌嘅初衷，都會喺社交媒體上建立品牌專頁或帳戶，將自己嘅初心同產品故事，透過圖片文字傾訴，以真誠分享心聲。

信息——產品要有說話

營運自己嘅手作品牌，當然最重要係爭取到目標顧客嘅認同（即係共鳴），咁客人先會欣賞自己嘅產品。

好似香港人成日要「捱驢仔」，要捱到大時大節先會送啲嘢氹自己或人哋開心。Amanda成立da HERS就係希望打破呢種固有嘅送禮文化 —— 送禮唔需要有特別嘅日子，其實平日都可以買小禮物送俾自己或朋友作為獎勵，讓自己開心同滿足。

於是Amanda特別揀香港常見嘅花做主軸，想人望見花而感到快樂。而花代表住唔同性格，見到花更會聯想起唔同嘅人。佢設計咗不同嘅花束卡，讓人可以寫上鼓勵嘅字句，再送俾送禮對象，為對方打打氣。

香港社會亦好著重每個人都要一式一樣，只要自己的模式（Pattern）與人不同就會惶恐。

好似Wing咁，當佢發現自己同人哋唔同嗰陣，就會感到不安；但最後發現人人都可以有唔同，唔需要覺得自己唔夠好，可以嘗試接受自己，甚至退隱一下。近月，Patterntone就推出怕羞草系列嘅手縫筆記簿、貼紙等產品，希望每次客人用嘅時候都會諗起呢種切身嘅鼓勵。佢話：「當好攰嘅時候，記得要好好休息，或者可以好似怕羞草咁摺埋，抖足精神再出嚟。」

包裝——向人有效分享品牌

當有信息又想傳遞俾客人嘅時候，就需要一條好嘅溝通橋樑。產品包裝就可以幫到你，無論係擺市集定寄賣，客人會由你嘅包裝開始，了解品牌背後嘅心思。

開頭Wing喺擺市集嘅時候，每次都會直接向客人介紹，但好多時未開始講，客人就走咗。為咗唔好咁長氣，同時畀客人睇到佢嘅信息，佢決定由包裝到著手。直接將品牌簡介印喺書腰上面，等客人可以更直接咁了解到佢想講嘅嘢。

而da HERS同一般紙品品牌唔同，佢使用十款唔同設計嘅花束卡同底卡，客人可以將佢哋自由組合，因應想送卡嘅人嘅性格而配搭成具有「個人特色」嘅禮物，每一張都可能係獨一無二。

市面上雖有好多類近嘅手作品牌，只要將信息同包裝結合，咁就可以用產品同你目標顧客好好咁說話。

不過說話係雙向嘅，除咗用作品說話之外，都要用心聽聽客人講乜，先可以對準佢哋嘅需要而推出產品。客人未必會直接話你知佢哋諗乜，但你可以透過分析廣告平台嘅數據而了解到佢哋無講出嘅說話。